Rubob yasash va o'ynash san'ati UNESCO tomonidan nomoddiy meros deb tan olindi.

"Dunyo" nashrining yozishicha, qo'mita qarorida rubob – Markaziy, Janubiy va Janubi-g'arbiy Osiyoning eng qadimiy musiqiy asboblaridan biri ekani ta'kidlangan.

"Rubob Markaziy Osiyo mintaqasidagi xalqlarni birlashtiruvchi omil hisoblanadi. U madaniy va ijtimoiy birlashuvni rag'batlantiradi hamda madaniy almashinuvlar va birdamlikni rivojlantirishda muhim rol o'ynaydi", – deyiladi xabarda.

Rubob yasash va unda o'ynash san'ati O'zbekiston tashabbusi bilan UNESCOning Vakillik ro'yxatiga kiritilgan insoniyatning 16-elemnti bo'ldi. Shuningdek, bu san'at sifatli ta'lim, jinsiy tenglik, inklyuziv iqtisodiy va barqaror rivojlanishga hissa qo'shishi ta'kidlangan.

UNESCOning nematerial madaniy merosi ro'yxatiga jamiyatning madaniyati, an'analari, urf-odatlari – qo'shiqlar, odatlar, ko'nikmalar va hunarlarni tashkil etuvchi barcha narsalar kiritiladi. Ular nematerial madaniy yoki jonli meros deb ataladi.

O'tgan yili O'zbekistondan bu ro'yxatga ta'ziya san'ati, iftor va keramika san'ati kiritildi. Shuningdek, ro'yxatga Navro'z, plov, xurozm raqsi lazgi, atlas va adras tayyorlash, o'zbek miniaturasi ham kiradi.

2024 yil 2-7 dekabr kunlari Paragvayning Asunsion shahrida UNESCOning nematerial madaniy merosini muhofaza qilish bo'yicha Hukumatlararo qo'mitasining 19-sessiyasi o'tkaziladi. Sessiya davomida 90 davlat tomonidan taqdim etilgan 63 ta ariza Konvensiya ro'yxatlariga kiritish uchun ko'rib chiqiladi.